കേന്ദ്ര സര്‍ക്കാരിൻ്റെ വിവിധ വകുപ്പുകളിൽ 6.83 ലക്ഷം ഒഴിവുകളുണ്ടെന്ന് കേന്ദ്ര പേഴ്സസണൽ സഹമന്ത്രി . 2018 മാര്‍ച്ച് ഒന്ന് വരെയുള്ള കണക്കുകൾ പ്രകാരം 38,02,779 ഒഴിവുകളിൽ 31,18,956 എണ്ണത്തിൽ മാത്രമാണ് നിയമനം നടന്നതെന്നും അദ്ദേഹം വ്യക്തമാക്കി.

2019-2020ൽ യു.പി.എസ്.സി, സ്റ്റാഫ് സെലക്ഷൻ കമ്മീഷൻ, റെയിൽവേ റിക്രൂട്ട്മെൻ്റ് ബോര്‍ഡ് എന്നിവയിൽ 1034 തസ്തികകളിൽ നിയമനം നടത്തും. ആകെയുള്ള തസ്തികകളിൽ 1,16,391 എണ്ണം ആര്‍.ആര്‍.ബിയും 13,995 എണ്ണം എസ്.എസ്.ബിയും 4399 എണ്ണം യുപിഎസ്എസിയും നിയമനത്തിനായി ശുപാര്‍ശ ചെയ്തുവെന്നും മന്ത്രി പറഞ്ഞു. മാത്രമല്ല, വിരമിക്കൽ, രാജി, മരണം, സ്ഥാനക്കയറ്റം തുടങ്ങിയ കാരണങ്ങൾ മൂലം ഒഴിവ് വന്ന തസ്തികകൾ എത്രയും വേഗം നികത്തുമെന്നും മന്ത്രി അറിയിച്ചു.

സമയ ബന്ധിതമായി എല്ലാ മേഖലകളിലും നിയമനം നടത്തും. എസ്.എസ്.സി, ആര്‍.ആര്‍.ബി, പോസ്റ്റൽ സര്‍വീസ് ബോര്‍ഡ്, പ്രതിരോധ മന്ത്രാലയം തുടങ്ങിയവ 3,10,832 ഒഴിവുകളിലേക്കുള്ള നിയമന പ്രക്രിയ നടത്തുകയാണെന്നും അതിൽ 27,652 തസ്തികകൾ പ്രതിരോധ രംഗത്താണെന്നും മന്ത്രി വ്യക്തമാക്കി.

അതേസമയം, നിയമന പ്രക്രിയ ലളിതമാക്കാൻ പല റിക്രൂട്ടിങ് ഏജൻസികളും ഓൺലൈൻ പരീക്ഷകളിലേക്ക് കടന്നിട്ടുണ്ടെന്നും നോൺ ഗസറ്റഡ് തസ്തികകളിലേക്ക് നിയമനത്തിന് അഭിമുഖവും ഒഴിവാക്കി പശ്ചാത്തല പരിശോധനക്ക് മുൻപ് താത്കാലിക നിയമനം നടത്തുമെന്നും മന്ത്രി ചൂണ്ടിക്കാണിച്ചു.